కేయూలో ఏడుగురు అసిస్టెంట్‌ ప్రొఫెసర్లకు షోకాజ్‌.. యూజీసీకి లేఖలపై అభ్యంతరం

వరంగల్: కాకతీయ యూనివర్సిటీలో అసిస్టెంట్‌ ప్రొఫెసర్ల ప్రమోషన్ల వ్యవహారం మరోసారి చర్చనీయాంశంగా మారింది. యూజీసీకి నేరుగా లేఖలు రాసిన ఏడుగురు అసిస్టెంట్‌ ప్రొఫెసర్లకు యూనివర్సిటీ రిజిస్ట్రార్‌ ప్రొఫెసర్‌ వల్లూరి రామచంద్రం షోకాజ్‌ నోటీసులు జారీ చేసినట్లు తెలిసింది. కాకతీయ యూనివర్సిటీ క్యాంపస్‌, కొత్తగూడెం ఇంజనీరింగ్‌ కళాశాలలో పనిచేస్తున్న ఈ ఏడుగురు అధ్యాపకులు తమ ప్రమోషన్లకు సంబంధించిన అంశంపై యూజీసీ కార్యదర్శికి లేఖ రాసినట్లు సమాచారం. యూజీసీ నిబంధనల ప్రకారం తమకు ప్రొఫెసర్‌ పదోన్నతులు కల్పించే అవకాశం కల్పించాలని వారు లేఖలో కోరినట్లు తెలిసింది. అయితే యూనివర్సిటీ అధికారుల దృష్టికి తీసుకురాకుండా నేరుగా యూజీసీకి లేఖలు ఎందుకు రాశారనే అంశంపై రిజిస్ట్రార్‌ వివరణ కోరినట్లు సమాచారం. ఈ మేరకు ఏడుగురు అసిస్టెంట్‌ ప్రొఫెసర్లకు షోకాజ్‌ నోటీసులు జారీ చేసినట్లు తెలుస్తోంది. ప్రమోషన్లపై నిబంధనల మార్పు అసిస్టెంట్‌ ప్రొఫెసర్ల ప్రమోషన్లకు సంబంధించి గతంలో అమల్లో ఉన్న యూజీసీ జీవో నంబర్‌ 14 ఆధారంగా తమకు కూడా పదోన్నతులు కల్పించాలని అధ్యాపకులు కోరినట్లు సమాచారం. గతంలో పనిచేసిన వీసీలు, రిజిస్ట్రార్లు అదే నిబంధనలను అనుసరించి కొందరికి ప్రొఫెసర్‌ ప్రమోషన్లు కల్పించారని వారు తమ లేఖలో ప్రస్తావించినట్లు తెలిసింది. ఇటీవల వెలువడిన జీవో నంబర్‌ 15 కారణంగా తమ ప్రమోషన్లు మరింత ఆలస్యం అయ్యే అవకాశం ఉందని అధ్యాపకులు యూజీసీ దృష్టికి తీసుకెళ్లినట్లు సమాచారం. కొత్త నిబంధనల ప్రకారం పీహెచ్‌డీ విద్యార్థులకు గైడ్‌గా వ్యవహరించడంతో పాటు, కనీసం ఒక విద్యార్థి థీసిస్‌ పూర్తి చేసి అవార్డు పొందేలా పర్యవేక్షించిన తర్వాతే ప్రొఫెసర్‌ ప్రమోషన్‌కు అర్హత ఉంటుందని పేర్కొన్నట్లు సమాచారం. పీహెచ్‌డీ ప్రక్రియ ఆలస్యం.. ప్రమోషన్లపై ప్రభావం పీహెచ్‌డీ అడ్మిషన్లు, పరిశోధన, థీసిస్‌ సమర్పణ వంటి ప్రక్రియలు వివిధ కారణాలతో ఆలస్యమవుతున్నాయని అధ్యాపకులు తమ లేఖలో పేర్కొన్నట్లు తెలిసింది. దీంతో అవసరమైన సర్వీస్‌ పూర్తిచేసుకున్నప్పటికీ కొత్త నిబంధనల కారణంగా ప్రమోషన్లు ఆలస్యం అయ్యే పరిస్థితి ఏర్పడిందని వారు యూజీసీకి వివరించినట్లు సమాచారం. ఈ నేపథ్యంలో తమకు ఉన్న అవకాశాలను పరిశీలించి ప్రమోషన్ల విషయంలో తగిన వెసులుబాటు కల్పించాలని అధ్యాపకులు కోరినట్లు తెలుస్తోంది. నేరుగా యూజీసీకి లేఖలపై యూనివర్సిటీ అభ్యంతరం మరోవైపు యూనివర్సిటీ ఉన్నతాధికారులు మాత్రం అధికారిక వ్యవహారాల్లో పాటించాల్సిన విధానాలపైనే అభ్యంతరం వ్యక్తం చేస్తున్నట్లు సమాచారం. యూనివర్సిటీ కోడ్‌ ఆఫ్‌ కండక్ట్‌ ప్రకారం సంబంధిత అధికారుల ద్వారా మాత్రమే ఉన్నత సంస్థలకు లేఖలు పంపాల్సి ఉంటుందని అధికారులు చెబుతున్నట్లు తెలిసింది. దీంతో ప్రమోషన్‌ నిబంధనలపై అధ్యాపకులు లేవనెత్తిన అంశం ఒకవైపు ఉండగా, యూజీసీకి నేరుగా లేఖలు పంపిన విధానంపై యూనివర్సిటీ తీసుకున్న చర్య మరోవైపు చర్చకు దారితీసింది. ప్రస్తుతం షోకాజ్‌ నోటీసులకు అధ్యాపకులు ఇచ్చే వివరణ ఆధారంగా తదుపరి పరిణామాలు ఉండే అవకాశం ఉంది.