బంగారం వ్యాపారి కిడ్నాప్ కేసులో బిగ్ ట్విస్ట్.. రూ.1.5 కోట్లు ఇచ్చి విడిపించారా?

హైదరాబాద్: చిక్కడపల్లి బంగారం వ్యాపారి శ్రీనివాసరావు కిడ్నాప్ కేసులో కీలక విషయాలు వెలుగులోకి వచ్చినట్లు సమాచారం. కిడ్నాపర్ల చెర నుంచి బయటపడిన తీరుపై తొలుత ఆయన చెప్పిన వివరాలకు, పోలీసుల దర్యాప్తులో వెల్లడైన అంశాలకు మధ్య వ్యత్యాసం ఉన్నట్లు తెలుస్తోంది. కుటుంబ సభ్యులు కిడ్నాపర్లకు మొత్తం రూ.1.5 కోట్లు చెల్లించి వ్యాపారిని విడిపించుకున్నారనే సమాచారం ఈ కేసులో సంచలనంగా మారింది. ఈ నెల 5న రామంతపూర్‌లోని తన బంగారు నగల దుకాణం నుంచి శ్రీనివాసరావును ఏడుగురు సభ్యుల ముఠా అపహరించినట్లు పోలీసులు గుర్తించారు. అనంతరం వ్యాపారి కుటుంబ సభ్యులను సంప్రదించిన కిడ్నాపర్లు తొలుత రూ.కోటి ఇవ్వాలని డిమాండ్ చేసినట్లు దర్యాప్తులో వెల్లడైంది. డబ్బులు తీసుకుని 6వ తేదీ ఉదయం కాళీమాత ఆలయం వద్దకు రావాలని కిడ్నాపర్లు సూచించినట్లు సమాచారం. దీంతో శ్రీనివాసరావు భార్య తెల్లవారుజామున రూ.70 లక్షల నగదుతో అక్కడికి వెళ్లారు. అయితే ఆమెను పోలీసులు అనుసరిస్తున్నారనే అనుమానంతో కిడ్నాపర్లు వ్యాపారిని తమతో తీసుకుని అక్కడి నుంచి పరారైనట్లు తెలుస్తోంది. ఈ ఘటన తర్వాత కేసును సీరియస్‌గా తీసుకున్న పోలీసులు సాంకేతిక ఆధారాలతో నిందితుల కోసం గాలింపు చేపట్టారు. ఏడుగురు సభ్యుల ముఠాలో ఆరుగురిని అదుపులోకి తీసుకున్నట్లు సమాచారం. కిడ్నాపర్ల చెర నుంచి తానే బయటపడ్డానని శ్రీనివాసరావు తొలుత పోలీసులకు చెప్పినప్పటికీ, ఆ వాదనకు భిన్నమైన అంశాలు విచారణలో వెలుగులోకి వచ్చినట్లు తెలుస్తోంది. తమ ఆచూకీని పోలీసులు గుర్తించకుండా నిందితులు వర్చువల్ కాల్స్ ఉపయోగించినట్లు దర్యాప్తులో గుర్తించినట్లు సమాచారం. ఈ కేసుకు సంబంధించి నిందితులను అక్టోబరు 13న మీడియా ముందు ప్రవేశపెట్టి మరిన్ని వివరాలు వెల్లడించే అవకాశం ఉంది. అయితే కిడ్నాప్ వెనుక అసలు కారణాలు, డబ్బు చెల్లింపులకు సంబంధించిన పూర్తి వివరాలపై పోలీసుల అధికారిక ప్రకటన వెలువడాల్సి ఉంది.