ఓల్డ్ బోయిన్‌పల్లిలో బీఆర్ఎస్ నిరసన.. ఎమ్మెల్యేల సస్పెన్షన్‌పై ఆగ్రహం

సికింద్రాబాద్: తెలంగాణ అసెంబ్లీ నుంచి బీఆర్ఎస్ ఎమ్మెల్యేలను మొత్తం సమావేశాల కాలానికి సస్పెండ్ చేయడాన్ని నిరసిస్తూ సికింద్రాబాద్‌లోని ఓల్డ్ బోయిన్‌పల్లిలో బీఆర్ఎస్ నాయకులు, కార్యకర్తలు ధర్నా నిర్వహించారు. మాజీ కార్పొరేటర్ ముద్దం నర్సింహ యాదవ్ ఆధ్వర్యంలో జరిగిన ఈ కార్యక్రమంలో పార్టీ నాయకులు, కార్యకర్తలు, మహిళా నాయకులు పెద్ద సంఖ్యలో పాల్గొన్నారు. ఈ సందర్భంగా ముద్దం నర్సింహ యాదవ్ మాట్లాడుతూ.. బీఆర్ఎస్ వర్కింగ్ ప్రెసిడెంట్ కేటీఆర్, కూకట్‌పల్లి ఎమ్మెల్యే మాధవరం కృష్ణారావుతో పాటు ఇతర బీఆర్ఎస్ ఎమ్మెల్యేలను అసెంబ్లీ సమావేశాల నుంచి సస్పెండ్ చేయడం అప్రజాస్వామిక చర్య అని విమర్శించారు. ప్రజా సమస్యలను అసెంబ్లీలో ప్రస్తావిస్తూ ప్రభుత్వాన్ని ప్రశ్నిస్తున్న ప్రతిపక్ష ఎమ్మెల్యేలపై సస్పెన్షన్‌ విధించడం ద్వారా ప్రజాస్వామ్య వ్యవస్థలో ప్రతిపక్ష పాత్రను ప్రభుత్వం బలహీనపరుస్తోందని ఆయన ఆరోపించారు. కేటీఆర్, మాధవరం కృష్ణారావు ప్రజా సమస్యలపై చేస్తున్న పోరాటానికి బీఆర్ఎస్ శ్రేణులు అండగా ఉంటాయని తెలిపారు. ఎమ్మెల్యేలను సస్పెండ్ చేసినా.. ప్రజా సమస్యలపై తమ పోరాటం ఆగదని ముద్దం నర్సింహ యాదవ్ స్పష్టం చేశారు. ఈ అంశంపై బీఆర్ఎస్ శ్రేణులు నిరసనలు కొనసాగించే అవకాశముందని పార్టీ వర్గాలు పేర్కొన్నాయి.