ఓర్వకల్లు మండలంలో అభివృద్ధి పనులకు శ్రీకారం.. రూ.37.97 కోట్లతో పల్లెపండుగ పనులు

ఓర్వకల్లు, అక్టోబరు 6: గ్రామీణ ప్రాంతాల్లో మౌలిక వసతులను మెరుగుపరిచే దిశగా కర్నూలు జిల్లా ఓర్వకల్లు మండలంలో పలు అభివృద్ధి పనులకు శ్రీకారం చుట్టారు. లొద్దిపల్లె, ఉయ్యాలవాడ, ఉప్పలపాడు గ్రామాల్లో తాగునీరు, రహదారులు, ఆరోగ్య మౌలిక వసతులకు సంబంధించిన పనులను ఎమ్మెల్యే గౌరు చరితారెడ్డి, టీటీడీ బోర్డు సభ్యుడు మల్లెల రాజశేఖర్‌ ప్రారంభించారు. లొద్దిపల్లె గ్రామంలో జల్‌జీవన్‌ మిషన్‌-2.0 కింద రూ.30 లక్షల వ్యయంతో చేపట్టనున్న తాగునీటి పైపులైన్‌, బోరు పనులకు ఎమ్మెల్యే భూమిపూజ చేశారు. గ్రామీణ ప్రాంతాల్లో తాగునీటి సదుపాయాలను మెరుగుపరచడమే ఈ పనుల ప్రధాన లక్ష్యం. ఉయ్యాలవాడలో కొండపై ఉన్న లక్ష్మీ వేంకటేశ్వరస్వామి ఆలయానికి వెళ్లే రహదారి నిర్మాణానికి టీటీడీ నిధుల నుంచి రూ.1.83 కోట్లు కేటాయించారు. ఈ పనులకు భూమిపూజ చేసి నిర్మాణాన్ని ప్రారంభించారు. అదే గ్రామంలో పల్లె పండుగ 1, 2, ఉపాధి హామీ పథకం (NREGS) నిధులతో రూ.70 లక్షలతో నిర్మించిన సీసీ రోడ్డును ప్రారంభించారు. పల్లె పండుగ 3 కింద మరో రూ.20 లక్షలతో చేపట్టనున్న సీసీ రోడ్డు పనులకు కూడా భూమిపూజ చేశారు. అలాగే రూ.40 లక్షల వ్యయంతో నిర్మించిన హెల్త్‌ క్లినిక్‌ సెంటర్‌ను ప్రారంభించారు. దీంతో గ్రామీణ ప్రజలకు స్థానికంగానే ప్రాథమిక వైద్య సేవలు అందుబాటులోకి రానున్నాయి. ఈ సందర్భంగా ఎమ్మెల్యే గౌరు చరితారెడ్డి మాట్లాడుతూ పాణ్యం నియోజకవర్గంలో పల్లె పండుగ కార్యక్రమం ద్వారా రూ.37.97 కోట్ల విలువైన అభివృద్ధి పనులు చేపడుతున్నట్లు తెలిపారు. ఓర్వకల్లు మండలాన్ని పారిశ్రామిక హబ్‌గా అభివృద్ధి చేయాలనే లక్ష్యంతో ముందుకు సాగుతున్నట్లు పేర్కొన్నారు. కార్యక్రమంలో రాష్ట్ర విద్యా సంక్షేమ మౌలిక వసతుల సంస్థ డైరెక్టర్‌ నాగముని, మండల ప్రత్యేక అధికారి సునీల్‌కుమార్‌, ఎంపీడీవో నాగ అనసూయ, ఏఈ సురేంద్రరెడ్డి, అధికారులు, ప్రజాప్రతినిధులు పాల్గొన్నారు.