చమురు నౌకపై డ్రోన్ దాడి.. ఇద్దరు భారతీయ నావికులు గల్లంతు

ఇంటర్నెట్ డెస్క్: ఒమన్ తీరానికి సమీపంలో చమురు రవాణా నౌకపై జరిగిన డ్రోన్ దాడి కలకలం రేపింది. ఈ ఘటనలో ఇద్దరు భారతీయ నావికులు గల్లంతయ్యారు. నౌకలో ఉన్న మరో తొమ్మిది మంది భారతీయులను అధికారులు సురక్షితంగా రక్షించారు. అక్టోబర్ 11న ఒమన్‌లోని సోహార్ నౌకాశ్రయం సమీపంలో ఈ ఘటన చోటుచేసుకుంది. నికరాగ్వా జెండాతో ప్రయాణిస్తున్న ఎంటీ పెట్రో డాల్ఫిన్ (MT Petro Dolphin) అనే చమురు రవాణా నౌకపై డ్రోన్ దాడి జరిగినట్లు అధికారులు వెల్లడించారు. దాడి సమయంలో నౌకలో 11 మంది భారతీయ నావికులు ఉన్నారు. సహాయక చర్యల్లో తొమ్మిది మందిని రక్షించగా, మరో ఇద్దరి ఆచూకీ తెలియరాలేదు. గల్లంతైన నావికుల కోసం స్థానిక తీర రక్షక దళం గాలింపు చర్యలు చేపట్టింది. వారి ఆచూకీ తెలుసుకునేందుకు అధికారులు ప్రయత్నాలు కొనసాగిస్తున్నారు. ఈ ఘటనపై కేంద్ర నౌకాశ్రయాలు, నౌకాయాన శాఖ మంత్రి సర్బానంద సోనోవాల్ స్పందించారు. ఇద్దరు భారతీయ నావికులు గల్లంతైన విషయాన్ని ధ్రువీకరించారు. వారిని గుర్తించేందుకు స్థానిక అధికారులతో నిరంతరం సంప్రదింపులు జరుపుతున్నట్లు తెలిపారు. మరోవైపు, మస్కట్‌లోని భారత రాయబార కార్యాలయం కూడా పరిస్థితిని నిశితంగా పర్యవేక్షిస్తోంది. సంబంధిత అధికారులతో సంప్రదింపులు కొనసాగిస్తూ, గల్లంతైన భారతీయ నావికుల ఆచూకీపై దృష్టి సారించింది.