నైజీరియాలో విషాదం.. 32 మందితో వెళ్తున్న విమానం ప్రమాదం

నైజీరియాలో సోమవారం తీవ్ర విమాన ప్రమాదం చోటుచేసుకుంది. 25 మంది ప్రయాణికులు, ఏడుగురు సిబ్బందితో కలిపి మొత్తం 32 మందితో వెళ్తున్న నైజీరియన్ ఎయిర్‌ఫోర్స్‌కు చెందిన ATR-42 విమానం ప్రమాదానికి గురైంది. బెనిన్ నగరం నుంచి లాగోస్‌కు వెళ్తుండగా ఈ ఘటన చోటుచేసుకుంది. స్థానిక కాలమానం ప్రకారం ఉదయం 9 గంటల ప్రాంతంలో విమానం రాడార్‌ నుంచి అకస్మాత్తుగా అదృశ్యమైంది. అనంతరం ఒండో రాష్ట్రంలోని ఇగ్బోకోడా ప్రాంతంలో విమానం ప్రమాదానికి గురైనట్లు అధికారులు గుర్తించారు. ప్రమాదానికి ఖచ్చితమైన కారణాలు ఇంకా వెల్లడికాలేదు. రాడార్ నుంచి అదృశ్యం.. ఆపై ప్రమాదం బెనిన్ నుంచి లాగోస్‌కు సాధారణ మిషన్‌లో బయలుదేరిన విమానం ప్రయాణం మధ్యలోనే రాడార్ సంబంధాన్ని కోల్పోయింది. వాతావరణ పరిస్థితులు లేదా సాంకేతిక సమస్య కారణంగా ప్రమాదం జరిగి ఉండొచ్చనే అనుమానాలు వ్యక్తమవుతున్నప్పటికీ, అధికారికంగా కారణం నిర్ధారించాల్సి ఉంది. ఈ ఘటనను నైజీరియా పౌర విమానయాన శాఖ మంత్రి ఫెస్టస్ కయామో ధృవీకరించారు. విమానం ఒండో రాష్ట్రంలోని అటవీ లేదా గ్రామీణ ప్రాంతంలో కూలిపోయినట్లు అధికారులు తెలిపారు. ముమ్మరంగా సెర్చ్ అండ్ రెస్క్యూ ప్రమాదం జరిగిన వెంటనే నైజీరియన్ ఎయిర్‌ఫోర్స్ అత్యవసర బృందాలను రంగంలోకి దించింది. ఆర్మీ సిబ్బంది, పోలీసు అధికారులు, అత్యవసర వైద్య బృందాలు సహాయక చర్యల్లో పాల్గొంటున్నాయి. విమానంలో ఉన్న 32 మంది పరిస్థితిపై పూర్తి సమాచారం ఇంకా అందాల్సి ఉంది. శిథిలాలను గుర్తించి, ప్రయాణికుల పరిస్థితిని నిర్ధారించేందుకు సహాయక బృందాలు తీవ్రంగా శ్రమిస్తున్నాయి. ఈ ఘటనపై ధృవీకరించని సమాచారాన్ని సోషల్ మీడియాలో ప్రచారం చేయవద్దని ఒండో స్టేట్ పోలీస్ కమాండ్ ప్రజలను కోరింది. ప్రమాదానికి గల అసలు కారణాలు, విమానంలో ఉన్న వారి పరిస్థితిపై అధికారిక సమాచారం అందిన తర్వాతే పూర్తి స్పష్టత వచ్చే అవకాశం ఉంది.