పేపర్ లీకులకు చెక్ పెట్టాలంటే పరీక్షా విధానంలో మార్పులు.. నందన్ నీలేకని కీలక సూచనలు

ప్రశ్నపత్రాల లీకేజీకి అడ్డుకట్ట వేయాలంటే పరీక్షల నిర్వహణ విధానంలోనే సమూల మార్పులు తీసుకురావాల్సిన అవసరం ఉందని ఇన్ఫోసిస్ సహ వ్యవస్థాపకుడు నందన్ నీలేకని అభిప్రాయపడ్డారు. ముందుగానే ప్రశ్నపత్రాలను సిద్ధం చేసే సంప్రదాయ విధానానికి బదులుగా.. చివరి నిమిషంలో ప్రశ్నలను ఎంపిక చేసి పేపర్ రూపొందించే విధానాన్ని అమలు చేయాలని సూచించారు. కంప్యూటర్ ఆధారిత పరీక్షల నిర్వహణను విస్తరించడం ద్వారా లీకేజీ ముప్పును తగ్గించవచ్చని పేర్కొన్నారు. ప్రశ్నల బ్యాంక్‌తో కొత్త విధానం ప్రస్తుతం పరీక్షల కోసం నిర్దిష్ట ప్రశ్నపత్రాలను ముందుగానే రూపొందించడం వల్ల అవి లీకయ్యే ప్రమాదం ఉంటోందని నీలేకని అభిప్రాయపడ్డారు. ఈ సమస్యను అధిగమించేందుకు వివిధ అంశాలకు సంబంధించిన పెద్ద సంఖ్యలో ప్రశ్నలతో సమగ్ర క్వశ్చన్ బ్యాంక్‌ను రూపొందించాలని సూచించారు. అందులో నుంచి చివరి నిమిషంలో ప్రశ్నలను ఎంపిక చేసి ప్రశ్నపత్రాన్ని సిద్ధం చేస్తే.. ముందుగానే పేపర్ బయటకు వెళ్లే అవకాశాలు తగ్గుతాయని వివరించారు. ప్రశ్నపత్రం ముందుగానే అందుబాటులో ఉంటే దాన్ని అక్రమంగా విక్రయించి సొమ్ము చేసుకోవాలని చూసేవారు ఉంటారని ఆయన వ్యాఖ్యానించారు. అందువల్ల కేవలం లీకేజీ జరిగిన తర్వాత చర్యలు తీసుకోవడం కంటే.. లీకేజీకి అవకాశమిచ్చే పరిస్థితులను ముందుగానే తొలగించడంపై దృష్టి పెట్టాలని సూచించారు. కంప్యూటర్ ఆధారిత పరీక్షలపై దృష్టి పరీక్షల నిర్వహణలో సాంకేతిక పరిజ్ఞానాన్ని విస్తృతంగా వినియోగించుకోవాలని నీలేకని సూచించారు. కంప్యూటర్ ఆధారిత పరీక్షా విధానాన్ని అమలు చేయడంతో పాటు, విద్యార్థులకు అందుబాటులో ఉండే పరీక్షా కేంద్రాల సంఖ్యను మరింత పెంచాలని పేర్కొన్నారు. ఇప్పటికే దేశవ్యాప్తంగా సుమారు 1.5 లక్షల కేంద్రాల్లో పరీక్షలు రాసే సదుపాయం ఉందని, ఈ నెట్‌వర్క్‌ను మరింత విస్తరించాల్సిన అవసరం ఉందని తెలిపారు. ఈ ప్రతిపాదనల అమలుపై ప్రధాని కూడా సానుకూలంగా ఉన్నారని నీలేకని వెల్లడించినట్లు కథనంలో పేర్కొన్నారు. నీట్ పేపర్ లీకేజీతో మరోసారి చర్చ దేశంలో పరీక్షల పారదర్శకత, ప్రశ్నపత్రాల భద్రతపై ఆందోళనలు వ్యక్తమవుతున్న నేపథ్యంలో నీలేకని సూచనలు ప్రాధాన్యం సంతరించుకున్నాయి. ముఖ్యంగా నీట్ పేపర్ లీకేజీ వ్యవహారం దేశవ్యాప్తంగా చర్చకు దారితీసింది. ఈ నేపథ్యంలో పరీక్షా వ్యవస్థలో సాంకేతిక మార్పులు, పటిష్ఠమైన భద్రతా చర్యలు, పారదర్శకమైన నిర్వహణ విధానాల అవసరం మరోసారి తెరపైకి వచ్చింది. అయితే, కంప్యూటర్ ఆధారిత పరీక్షలు లేదా చివరి నిమిషంలో ప్రశ్నపత్రాల రూపకల్పన మాత్రమే సమస్యకు పూర్తి పరిష్కారం కాదు. ప్రశ్నల భద్రత, పరీక్షా కేంద్రాల నిర్వహణ, సాంకేతిక నియంత్రణలు, బాధ్యతాయుతమైన పర్యవేక్షణ వంటి అంశాలను కూడా సమర్థంగా అమలు చేసినప్పుడే పేపర్ లీకేజీలను కట్టడి చేసే అవకాశం ఉంటుంది.