‘కామ్రేడ్ కళ్యాణ్’పై మహిమా నంబియార్ ఆసక్తికర వ్యాఖ్యలు.. శ్రీ విష్ణుతో నటించడం ఛాలెంజింగ్‌గా అనిపించింది!

కామ్రేడ్ కళ్యాణ్’ తన తొలి తెలుగు చిత్రమని మహిమా నంబియార్ తెలిపారు. ఇందులో సితార దేవి అనే పాత్రలో కనిపించనున్నట్లు చెప్పారు. అమాయకంగా, పక్కింటి అమ్మాయిలా కనిపించే ఈ పాత్ర ఒడిశా నుంచి వచ్చిన యువతిగా ఉంటుందని వివరించారు. ఒడిశాలో షూటింగ్ చేయడం తనకు కొత్త అనుభవమని, సినిమాలోని ‘ఒడియా పిల్లా’ పాటకు వస్తున్న స్పందన ఆనందాన్ని కలిగించిందని చెప్పారు. తెలుగు తనకు అర్థమవుతుందని, అయితే ప్రతి డైలాగ్‌ను దర్శకుడిని అడిగి తెలుసుకుని నటించానని మహిమా తెలిపారు. దీంతో తన పాత్రను మరింత లోతుగా అర్థం చేసుకుని నటించేందుకు అవకాశం లభించిందన్నారు. 90ల నేపథ్యం ప్రత్యేక ఆకర్షణ తాను గతంలో నటించిన తమిళ, మలయాళ సినిమాలను చూసిన దర్శకుడు జనకిరామ్ మారెళ్ల ఈ కథను చెప్పారని మహిమా వెల్లడించారు. కథ తనకు బాగా నచ్చడంతో వెంటనే సినిమాకు అంగీకరించినట్లు చెప్పారు. శ్రీ విష్ణు శైలిలో సాగే ఈ సినిమా మంచి ఫన్ ఎంటర్‌టైనర్‌గా ఉంటుందని, ముఖ్యంగా 90ల బ్యాక్‌డ్రాప్ తనకు చాలా కొత్తగా అనిపించిందని తెలిపారు. నక్సలిజం నేపథ్యం ఉన్నప్పటికీ, కథను పూర్తిగా సీరియస్‌గా కాకుండా వినోదాత్మకంగా తెరకెక్కించారని చెప్పారు. అన్ని అంశాలను కలిపిన మంచి కమర్షియల్ ప్యాకేజ్‌గా సినిమా ఉంటుందని మహిమా అభిప్రాయపడ్డారు. శ్రీ విష్ణుతో నటించడం కొత్త అనుభవం గతంలో శ్రీ విష్ణుతో ‘సామజవరగమన’ సినిమా చేయాల్సి వచ్చిందని, ఆ సినిమా కోసం ఫొటోషూట్ కూడా నిర్వహించినట్లు మహిమా చెప్పారు. అయితే కొన్ని కారణాల వల్ల ఆ ప్రాజెక్ట్‌లో నటించలేకపోయానన్నారు. ఇప్పుడు ‘కామ్రేడ్ కళ్యాణ్’తో శ్రీ విష్ణుతో కలిసి నటించడం సంతోషంగా ఉందని తెలిపారు. శ్రీ విష్ణు చాలా స్పాంటేనిటీ ఉన్న నటుడని, షూటింగ్ సమయంలో సన్నివేశానికి అనుగుణంగా తన నటనను ఇంప్రొవైజ్ చేస్తుంటారని మహిమా పేర్కొన్నారు. ఆయనతో కలిసి నటించడం కొంత ఛాలెంజింగ్‌గా అనిపించినప్పటికీ, అదే సమయంలో ఆయన నుంచి చాలా నేర్చుకున్నానని చెప్పారు. శ్రీ విష్ణు సినిమాల్లో ‘బ్రోచేవారెవరురా’ తనకు చాలా ఇష్టమని, ‘స్వాగ్’ కూడా చూశానని మహిమా తెలిపారు. విభిన్న పాత్రలపై ఆసక్తి తెలుగు ప్రేక్షకులు మంచి సినిమాలను భాషతో సంబంధం లేకుండా ఆదరిస్తారని మహిమా అన్నారు. ఒక నటిగా విభిన్నమైన పాత్రలు చేయాలన్నదే తన లక్ష్యమని చెప్పారు. తనకు న్యాయం చేయగలిగే ప్రతి కొత్త తరహా పాత్రను ప్రయత్నించాలని కోరుకుంటున్నట్లు వెల్లడించారు. ప్రస్తుతం తమిళం, మలయాళంలో ఒక్కో సినిమా చేస్తున్నానని, తెలుగులో కూడా మంచి కథలు వింటున్నానని మహిమా నంబియార్ తెలిపారు.