కొచ్చి: రోడ్లు డ్రైవింగ్ కోసమే కదా? ముగ్గురి ప్రాణాలు తీసిన ప్రమాదంలో నిందితుడి వ్యాఖ్యలు!

కేరళలోని కొచ్చి అంతర్జాతీయ విమానాశ్రయం సమీపంలో ఘోర రోడ్డు ప్రమాదం చోటుచేసుకుంది. అతి వేగంగా దూసుకొచ్చిన మినీ కూపర్ కారు.. స్కూటర్‌పై వెళ్తున్న ముగ్గురిని బలంగా ఢీకొట్టింది. ఈ ప్రమాదంలో దేవిక, గోపిక, ఇజాజ్ ప్రాణాలు కోల్పోయారు. ఆదివారం తెల్లవారుజామున ఎర్నాకుళం జిల్లా నెడుంబస్సేరిలో ఈ ఘటన జరిగింది. పోలీసుల వివరాల ప్రకారం.. ముగ్గురు స్నేహితులు సమీపంలోని దుకాణంలో టీ తాగి స్కూటర్‌పై ఇంటికి తిరిగి వెళ్తున్నారు. తెల్లవారుజామున సుమారు రెండు గంటల సమయంలో వెనుక నుంచి వేగంగా వచ్చిన మినీ కూపర్ కారు వారి స్కూటర్‌ను ఢీకొట్టింది. తీవ్రంగా గాయపడిన ముగ్గురిని స్థానికులు ఆస్పత్రికి తరలించినప్పటికీ ఫలితం లేకపోయింది. ఈ ప్రమాదానికి కారణమైన కారును 19 ఏళ్ల సుహైల్ సజీవ్ నడుపుతున్నట్లు పోలీసులు గుర్తించారు. ఘటన అనంతరం స్థానికులు అతడిని పట్టుకుని పోలీసులకు అప్పగించారు. ప్రమాద సమయంలో నిందితుడు మద్యం లేదా ఇతర మత్తు పదార్థాలు తీసుకున్నాడా అనే కోణంలో దర్యాప్తు కొనసాగుతోంది. ప్రాథమిక విచారణలో మద్యం సేవించి ఉండవచ్చనే అనుమానాలు వ్యక్తమైనప్పటికీ, రక్త నమూనాల పరీక్షల తుది నివేదికలు రావాల్సి ఉందని ఎర్నాకుళం రూరల్ ఎస్పీ కేఎస్ సుదర్శన్ తెలిపారు. కారులో మత్తు పదార్థాలకు సంబంధించిన ఆనవాళ్ల కోసం ఫోరెన్సిక్ బృందం కూడా పరీక్షలు నిర్వహిస్తోంది. నిందితుడి వ్యాఖ్యలపై తీవ్ర చర్చ ముగ్గురు ప్రాణాలు కోల్పోయిన ఈ ప్రమాదం కంటే, ఘటన అనంతరం నిందితుడు చేసినట్లు ప్రచారంలో ఉన్న వ్యాఖ్యలు మరింత చర్చకు దారితీశాయి. ‘రోడ్లు దేనికి? డ్రైవింగ్ కోసమే కదా?’ అని అతడు ప్రశ్నించినట్లు సమాచారం. ఈ విషయాన్ని తన తండ్రి చూసుకుంటారని కూడా చెప్పినట్లు తెలుస్తోంది. అయితే, ఈ వ్యాఖ్యలకు సంబంధించి అధికారికంగా నిర్ధారించిన వివరాలు అందుబాటులో లేవు. మరోవైపు, వైద్య పరీక్షల కోసం నిందితుడిని ఆస్పత్రికి తీసుకెళ్లిన సమయంలో మృతుల స్నేహితుల్లో కొందరు అతడిపై దాడి చేసినట్లు సమాచారం. పరిస్థితిని అదుపులోకి తీసుకొచ్చేందుకు పోలీసులు ఒకరిని అదుపులోకి తీసుకున్నారు. ఒక క్షణం నిర్లక్ష్యం, అతివేగం మూడు కుటుంబాల్లో తీరని విషాదాన్ని నింపాయి. ప్రమాదానికి అసలు కారణం, నిందితుడి పరిస్థితి వంటి అంశాలు దర్యాప్తులో తేలాల్సి ఉంది. రహదారులపై వేగ నియంత్రణ, బాధ్యతాయుతమైన డ్రైవింగ్ ఎంత ముఖ్యమో ఈ ఘటన మరోసారి గుర్తుచేస్తోంది.