ఇంద్రకీలాద్రిపై గాయత్రీ దేవిగా కనకదుర్గమ్మ.. రెండో రోజు భక్తుల రద్దీ

విజయవాడ: ఇంద్రకీలాద్రిపై దసరా శరన్నవరాత్రి ఉత్సవాలు వైభవంగా కొనసాగుతున్నాయి. ఉత్సవాల్లో రెండో రోజైన సోమవారం కనకదుర్గమ్మ గాయత్రీ దేవి అలంకరణలో భక్తులకు దర్శనమిస్తున్నారు. అమ్మవారిని దర్శించుకునేందుకు భక్తులు పెద్ద సంఖ్యలో తరలిరావడంతో ఆలయ పరిసరాలు సందడిగా మారాయి. భక్తుల రద్దీని దృష్టిలో ఉంచుకుని ఆలయ అధికారులు ప్రత్యేక ఏర్పాట్లు చేశారు. అమ్మవారి నామస్మరణతో ఇంద్రకీలాద్రి ఆధ్యాత్మిక శోభను సంతరించుకుంది. శరన్నవరాత్రుల మొదటి రోజైన ఆదివారం సుమారు లక్ష మంది భక్తులు కనకదుర్గమ్మను దర్శించుకున్నట్లు సమాచారం. రెండో రోజు కూడా భక్తుల రాక కొనసాగుతోంది. గాయత్రీ దేవి అలంకరణ ప్రత్యేకత గాయత్రీ దేవిని సకల వేద స్వరూపిణిగా, సమస్త మంత్రాలకు మూలశక్తిగా భక్తులు ఆరాధిస్తారు. ఐదు ముఖాలతో, వివిధ ఆయుధాలను ధరించి అమ్మవారు దర్శనమివ్వడం ఈ అలంకరణలో ప్రత్యేకత. గాయత్రీ మంత్ర జపం, దేవి ఉపాసన ద్వారా ఆధ్యాత్మిక జ్ఞానం, మంత్రసిద్ధి లభిస్తాయని పండితులు వివరిస్తారు. ప్రాతఃకాలంలో గాయత్రీగా, మధ్యాహ్నం సావిత్రిగా, సాయంసంధ్యలో సరస్వతిగా పరమేశ్వరిని ఉపాసించే సంప్రదాయం ఉందని పురోహితులు పేర్కొంటున్నారు. శ్రీశైలంలో బ్రహ్మచారిణి అలంకరణలో భ్రమరాంబాదేవి మరోవైపు, శ్రీశైలంలోనూ దసరా శరన్నవరాత్రి ఉత్సవాలు భక్తిశ్రద్ధలతో జరుగుతున్నాయి. రెండో రోజు భ్రమరాంబాదేవి బ్రహ్మచారిణి అలంకరణలో భక్తులకు దర్శనమిస్తున్నారు. అమ్మవారి దర్శనం కోసం భక్తులు భారీగా తరలివస్తున్నారు. రద్దీని నియంత్రించేందుకు ఆలయ అధికారులు అవసరమైన ఏర్పాట్లు చేపట్టారు. సోమవారం రాత్రి స్వామివారికి, అమ్మవారికి మయూర వాహనంపై ప్రత్యేక పూజలు నిర్వహించనున్నారు. అనంతరం శ్రీశైలం పురవీధుల్లో గ్రామోత్సవం జరగనుంది. విజయవాడ ఇంద్రకీలాద్రి, శ్రీశైలం క్షేత్రాల్లో శరన్నవరాత్రి వేడుకలు భక్తి, ఆధ్యాత్మిక వాతావరణం నడుమ కొనసాగుతున్నాయి.