ధనంజయ డి సిల్వ సంచలన నిర్ణయం.. టెస్టు కెప్టెన్సీకి గుడ్‌బై

శ్రీలంక టెస్టు క్రికెట్‌లో కీలక పరిణామం చోటుచేసుకుంది. ఆ జట్టు కెప్టెన్ ధనంజయ డి సిల్వ నాయకత్వ బాధ్యతల నుంచి తప్పుకుంటున్నట్లు ప్రకటించాడు. కెప్టెన్సీ నుంచి తక్షణమే వైదొలగాలని నిర్ణయించుకున్నట్లు గురువారం వెల్లడించాడు. అయితే ఆటగాడిగా జట్టులో కొనసాగుతానని స్పష్టం చేశాడు. కొత్త తరానికి నాయకత్వ బాధ్యతలు అప్పగించాల్సిన సమయం వచ్చిందనే ఉద్దేశంతోనే ఈ నిర్ణయం తీసుకున్నట్లు ధనంజయ డి సిల్వ శ్రీలంక సెలక్షన్ కమిటీకి రాసిన లేఖలో పేర్కొన్నాడు. కెప్టెన్సీని వదులుకున్నప్పటికీ, జట్టు కోసం ఆటగాడిగా తన సేవలను కొనసాగిస్తానని తెలిపాడు. ధనంజయ నిర్ణయాన్ని శ్రీలంక క్రికెట్ బోర్డు స్వాగతించింది. శ్రీలంక క్రికెట్ సీఈఓ ఆష్లే డి సిల్వ మాట్లాడుతూ.. టెస్టు జట్టుకు నాయకుడిగా ధనంజయ అందించిన సేవలను అభినందించారు. ఆయన భవిష్యత్తు విజయవంతంగా సాగాలని ఆకాంక్షించారు. 18 టెస్టులకు కెప్టెన్‌గా.. 1991లో కొలంబోలో జన్మించిన ధనంజయ డి సిల్వ 2015లో అంతర్జాతీయ క్రికెట్‌లోకి అరంగేట్రం చేశాడు. ఇప్పటివరకు 69 టెస్టులు, 93 వన్డేలు, 48 టీ20 మ్యాచ్‌లు ఆడాడు. టెస్టుల్లో 4,431 పరుగులు, వన్డేల్లో 1,924 పరుగులు, టీ20ల్లో 890 పరుగులు సాధించాడు. బౌలింగ్‌లోనూ జట్టుకు ఉపయోగపడిన ధనంజయ.. టెస్టుల్లో 43, వన్డేల్లో 48, టీ20ల్లో 17 వికెట్లు తీసుకున్నాడు. 2024 జనవరిలో దిముత్ కరుణరత్నె నుంచి శ్రీలంక టెస్టు జట్టు కెప్టెన్సీ బాధ్యతలను ధనంజయ స్వీకరించాడు. మొత్తం 18 టెస్టుల్లో జట్టుకు సారథ్యం వహించాడు. అందులో ఏడు మ్యాచ్‌ల్లో శ్రీలంకను విజయపథంలో నడిపించాడు. కెప్టెన్‌గా 1,130 పరుగులు చేయడంతో పాటు తొమ్మిది వికెట్లు కూడా సాధించాడు. ఇటీవల టీమిండియాతో జరిగిన టెస్టు సిరీస్‌లోనూ ధనంజయ డి సిల్వ శ్రీలంకకు నాయకత్వం వహించాడు. ఇప్పుడు ఆయన కెప్టెన్సీ నుంచి తప్పుకోవడంతో శ్రీలంక టెస్టు జట్టుకు కొత్త నాయకుడిని ఎంపిక చేయాల్సిన పరిస్థితి ఏర్పడింది. ధనంజయ తీసుకున్న నిర్ణయం ఆ జట్టు నాయకత్వ మార్పునకు నాంది పలికే అవకాశం ఉంది