ఏపీలో 271 మద్యం షాపులకు రీనోటిఫికేషన్‌.. 19 వరకు దరఖాస్తులు

అమరావతి: ఆంధ్రప్రదేశ్‌లో గతంలో రెన్యువల్‌ కాకుండా, లాటరీ ద్వారా కేటాయింపు జరగకుండా మిగిలిపోయిన 271 మద్యం షాపులకు ఎక్సైజ్‌ శాఖ రీనోటిఫికేషన్‌ జారీ చేసింది. అర్హులైన అభ్యర్థుల నుంచి ఈ నెల 19వ తేదీ వరకు దరఖాస్తులు స్వీకరించనున్నారు. ఈ నెల 21న లాటరీ విధానంలో షాపులను కేటాయించనున్నట్లు ఎక్సైజ్‌ శాఖ కమిషనర్‌ సీహెచ్‌ శ్రీధర్‌ వెల్లడించారు. మొత్తం 271 షాపుల్లో 267 సాధారణ మద్యం షాపులు ఉండగా, మరో నాలుగు షాపులను కల్లుగీత కులాలకు రిజర్వ్‌ చేశారు. జిల్లాల వారీగా చూస్తే కడపలో అత్యధికంగా 33 షాపులు ఉన్నాయి. నెల్లూరులో 24, గుంటూరు, తిరుపతిలో 19 చొప్పున, పశ్చిమగోదావరిలో 17, ప్రకాశంలో 16, అనంతపురంలో 15 షాపులు ఉన్నాయి. అనకాపల్లి, కృష్ణా జిల్లాల్లో 13 చొప్పున, బాపట్ల, పల్నాడు జిల్లాల్లో 12 చొప్పున, మార్కాపురంలో 11, శ్రీకాకుళంలో 10 షాపులు ఉన్నాయి. ఇతర జిల్లాల్లోనూ కొన్ని షాపులు మిగిలిపోయాయి. రాష్ట్రవ్యాప్తంగా మొత్తం 3,736 మద్యం షాపులకు గాను 2,929 షాపులు రెన్యువల్‌ కాగా, 536 షాపులను లాటరీ ద్వారా కేటాయించారు. అయినప్పటికీ 271 షాపులు మిగిలిపోవడంతో ఎక్సైజ్‌ శాఖ మరోసారి దరఖాస్తులకు అవకాశం కల్పించింది. ఆసక్తి, అర్హత కలిగిన వారు గడువులోగా దరఖాస్తు చేసుకోవాల్సి ఉంటుంది. ఈ నెల 21న జరగనున్న లాటరీతో మిగిలిన షాపుల కేటాయింపు ప్రక్రియ ముందుకు సాగనుంది.