అనకాపల్లి జిల్లాలో ఘోర రోడ్డు ప్రమాదం.. ట్రాలీని ఢీకొన్న టాటా ఇంట్రా వ్యాన్‌.. ఇద్దరి మృతి

: తెల్లవారుజామున జరిగిన రోడ్డు ప్రమాదం అనకాపల్లి జిల్లాలో విషాదాన్ని నింపింది. యలమంచిలి మండలం మర్రిబంద జంక్షన్‌ వద్ద రోడ్డు పక్కన నిలిపి ఉంచిన ట్రాలీని ఫ్రూట్స్‌ లోడ్‌తో వెళ్తున్న టాటా ఇంట్రా వ్యాన్‌ వెనుక నుంచి బలంగా ఢీకొట్టింది. ఈ ప్రమాదంలో వ్యాన్‌లో ప్రయాణిస్తున్న డ్రైవర్‌, క్లీనర్‌ ఇద్దరూ అక్కడికక్కడే మృతి చెందారు. పోలీసులు తెలిపిన వివరాల ప్రకారం.. తుని వైపు నుంచి అనకాపల్లి వైపు ఫ్రూట్స్‌ లోడ్‌తో టాటా ఇంట్రా వ్యాన్‌ (AP 39 WR 3630) వెళ్తోంది. మర్రిబంద జంక్షన్‌ సమీపంలో రోడ్డు పక్కన నిలిపి ఉంచిన ట్రాలీ (OD 07 BG 0870)ను వ్యాన్‌ వెనుక నుంచి వేగంగా ఢీకొట్టింది. ఢీకొన్న తీవ్రతకు వ్యాన్‌ ముందు భాగం పూర్తిగా ధ్వంసమైంది. ప్రమాదంలో డ్రైవర్‌, క్లీనర్‌ తీవ్రంగా గాయపడి అక్కడికక్కడే మృతి చెందినట్లు సమాచారం. ప్రమాదాన్ని గమనించిన స్థానికులు వెంటనే పోలీసులకు సమాచారం అందించారు. ఘటనాస్థలికి చేరుకున్న పోలీసులు సహాయక చర్యలు చేపట్టి, వ్యాన్‌లో చిక్కుకున్న మృతదేహాలను బయటకు తీశారు. అనంతరం పోస్టుమార్టం నిమిత్తం ఆస్పత్రికి తరలించే ఏర్పాట్లు చేశారు. మృతులు గుంటూరు జిల్లా నరసరావుపేటకు చెందినవారిగా పోలీసులు గుర్తించినట్లు సమాచారం. అయితే ప్రమాదానికి ఖచ్చితమైన కారణాలు ఇంకా పూర్తిగా నిర్ధారణ కాలేదు. రోడ్డు పక్కన ట్రాలీని నిలిపి ఉంచిన పరిస్థితులు, వ్యాన్‌ వేగం, డ్రైవర్‌ వాహనంపై నియంత్రణ కోల్పోవడానికి దారితీసిన కారణాలపై పోలీసులు దర్యాప్తు చేస్తున్నారు. ఈ ఘటనపై కేసు నమోదు చేసి దర్యాప్తు కొనసాగిస్తున్నట్లు పోలీసులు తెలిపారు. తెల్లవారుజామున జరిగిన ఈ ప్రమాదంతో మర్రిబంద జంక్షన్‌ పరిసరాల్లో విషాద వాతావరణం నెలకొంది.