జంతర్ మంతర్ నిరసనకు ముందే సీజేపీ వ్యవస్థాపకుడు అభిజీత్ దీప్కే అదుపులోకి!

న్యూఢిల్లీ: ఢిల్లీలోని జంతర్ మంతర్ వద్ద నిరసన చేపట్టేందుకు సిద్ధమైన కాక్రోచ్ జనతా పార్టీ (సీజేపీ)కి పోలీసుల చర్యలు ఎదురయ్యాయి. నిరసనకు నాయకత్వం వహించేందుకు ఢిల్లీ చేరుకున్న ఆ పార్టీ వ్యవస్థాపకుడు అభిజీత్ దీప్కేను పోలీసులు అదుపులోకి తీసుకున్నారు. శనివారం ఉదయం ముంబై నుంచి ఢిల్లీకి చేరుకున్న ఆయన విమానంలో ఉండగానే ఢిల్లీ పోలీసుల బృందం లోపలికి ప్రవేశించి అదుపులోకి తీసుకున్నట్లు సమాచారం. ఈ ఘటనను దీప్కే తన ఇన్‌స్టాగ్రామ్ లైవ్‌లో ప్రసారం చేశారు. సీజేపీ సభ్యులు సౌరవ్ దాస్, అశుతోష్ రాంకాలను కూడా పోలీసులు అదుపులోకి తీసుకున్నట్లు వార్తలు వెలువడ్డాయి. విమానం నుంచి ప్రయాణికులు దిగే వరకు వేచి చూడకుండా తమను అదుపులోకి తీసుకోవడంపై సీజేపీ సభ్యులు అభ్యంతరం వ్యక్తం చేశారు. ఈ క్రమంలో పోలీసులకు, పార్టీ సభ్యులకు మధ్య వాగ్వాదం చోటుచేసుకున్నట్లు సమాచారం. ప్రధాన ఎన్నికల కమిషనర్ జ్ఞానేశ్ కుమార్‌కు వ్యతిరేకంగా జంతర్ మంతర్ వద్ద నిరసన నిర్వహించాలన్నది సీజేపీ ప్రణాళికగా తెలుస్తోంది. ఈ నిరసనను అడ్డుకునేందుకు ఢిల్లీ పోలీసులు ముందస్తు చర్యలు చేపట్టినట్లు కథనాలు పేర్కొంటున్నాయి. మరోవైపు, యూట్యూబర్ ధ్రువ్ రాఠీ, సీజేపీ లీగల్ సెల్ హెడ్ రత్న సింగ్‌లను కూడా నిరసనలో పాల్గొనకుండా నిరోధించేందుకు వారి నివాసాల వద్ద అదుపులోకి తీసుకున్నట్లు వార్తలు వస్తున్నాయి. అంతేకాకుండా, రాజధానిలోని వివిధ ప్రాంతాల నుంచి 400 మందికి పైగా అనుమానిత నిరసనకారులను పోలీసులు అదుపులోకి తీసుకున్నట్లు సమాచారం. నిరసన ప్రారంభానికి ముందే పలువురిని అదుపులోకి తీసుకున్నట్లు వస్తున్న వార్తలతో ఈ పరిణామం రాజకీయంగా ప్రాధాన్యం సంతరించుకుంది. అయితే, పోలీసుల చర్యలకు సంబంధించిన పూర్తి అధికారిక వివరాలు, అదుపులోకి తీసుకున్న వారిపై తదుపరి చర్యలపై స్పష్టత రావాల్సి ఉంది.